عالمی شہرت یافتہ پاکستانی اداکارہ ماہرہ خان نے کہا ہے کہ وہ سینئر اداکار ہمایوں سعید کو ایک منفرد ولن کے کردار میں دیکھنے کی خواہش رکھتی ہیں، کیونکہ ان کے خیال میں وہ اس نوعیت کا کردار بخوبی نبھا سکتے ہیں۔
ماہرہ خان اور فہد مصطفیٰ اس وقت اپنی نئی آنے والی فلم ’’آگ لگے بستی میں‘‘ کی پروموشن میں مصروف ہیں، اور اسی سلسلے میں انہوں نے ایک نجی ٹی وی پروگرام میں شرکت کی جہاں فلم اور ذاتی کیریئر سے متعلق مختلف سوالات کے جوابات دیے۔
پروگرام کے دوران میزبان نے ماہرہ خان سے سوال کیا کہ وہ اداکار ہمایوں سعید کو کیا مشورہ دینا چاہیں گی، جس پر انہوں نے کہا کہ وہ ہمایوں سعید کو ایک ولن کے کردار میں دیکھنا چاہتی ہیں، خاص طور پر نوری نت جیسے منفرد اور یادگار کردار کی طرز پر۔ انہوں نے مزید کہا کہ ہمایوں کو ایکشن ہیرو بننے کا بھی شوق ہے اور وہ اس انداز میں بھی خود کو منوانا چاہتے ہیں۔
اسی موقع پر میزبان تابش ہاشمی نے ایکشن سے متعلق سوال اداکار فہد مصطفیٰ سے کیا، جس پر انہوں نے کہا کہ انہیں بھی ایکشن کرنے کا شوق ہے، تاہم پاکستان میں اس حوالے سے مطلوبہ سہولیات اور تکنیکی انتظامات محدود ہیں۔ فہد مصطفیٰ نے بتایا کہ حالیہ فلم کی شوٹنگ کے دوران ان کے ہاتھ کی ایک انگلی بھی ٹوٹ گئی تھی، جس سے اندازہ ہوتا ہے کہ ایکشن مناظر کی عکس بندی کے دوران کتنی احتیاط کی ضرورت ہوتی ہے۔
