کراچی: شہر قائد سیکیورٹی خدشات کے باعث متعدد اہم شاہراہوں کو عام ٹریفک کے لیے بند کر دیا گیا ہے جس کے نتیجے میں شہریوں کو شدید مشکلات کا سامنا ہے۔
حکام کے مطابق امریکن قونصل خانے کی طرف جانے والے تمام راستوں پر کنٹینرز اور رکاوٹیں کھڑی کر کے آمد و رفت محدود کر دی گئی ہے تاکہ کسی بھی ناخوشگوار واقعے سے بچا جا سکے۔
ٹریفک پولیس کے مطابق پی آئی ڈی سی چوک سے ایم ٹی خان روڈ کے ذریعے سلطان آباد جانے والی سڑک مکمل طور پر بند ہے جبکہ اسی مقام سے ضیاء الدین روڈ کے راستے سی ایم ہاؤس کی جانب جانے والی ٹریفک بھی معطل کر دی گئی ہے۔
اسی طرح ٹاور سے مائی کلاچی روڈ اور بورٹ بیسن سے مائی کلاچی جانے والے راستوں پر بھی رکاوٹیں لگا دی گئی ہیں۔ ان اقدامات کے باعث شہر کے مرکزی کاروباری علاقوں میں ٹریفک کا دباؤ بڑھ گیا ہے۔
سیکیورٹی اداروں کا کہنا ہے کہ ممکنہ احتجاج اور امن و امان کی صورتحال کے پیش نظر یہ اقدامات احتیاطاً کیے گئے ہیں۔ شہریوں کو متبادل راستے اختیار کرنے کی ہدایت کی گئی ہے جبکہ ٹریفک اہلکار مختلف مقامات پر موجود رہ کر گاڑیوں کو نئی روٹنگ کے مطابق گزرنے کی رہنمائی کر رہے ہیں۔
دوسری جانب شارع فیصل پر ایف ٹی سی کے قریب بھی ٹریفک کو بند کر دیا گیا ہے۔ ایف ٹی سی سے میٹروپول کی جانب جانے والی سڑک پر کنٹینرز رکھ دیے گئے ہیں، جبکہ گزشتہ روز سے اس حصے میں ٹریفک کی آمد و رفت محدود ہے۔
شارع فیصل کی جانب آنے والی گاڑیوں کو گورا قبرستان کے مقام سے یوٹرن دے کر صدر کی طرف موڑا جا رہا ہے، جس سے اطراف کی سڑکوں پر غیر معمولی رش دیکھنے میں آ رہا ہے۔
ٹریفک پولیس حکام کا کہنا ہے کہ کسی بھی دشواری کی صورت میں ہیلپ لائن سے رابطہ کریں۔ انتظامیہ کے مطابق سیکیورٹی صورتحال معمول پر آتے ہی سڑکیں مرحلہ وار کھول دی جائیں گی، تاہم فی الحال حفاظتی اقدامات کو ترجیح دی جا رہی ہے۔
