مالی سال کے پہلے آٹھ ماہ کے دوران براہ راست بیرونی سرمایہ کاری میں نمایاں کمی ریکارڈ کی گئی ہے، جس سے مجموعی سرمایہ کاری کے رجحان میں کمی کا اظہار ہوتا ہے۔
اسٹیٹ بینک کے مطابق جولائی سے فروری تک براہ راست بیرونی سرمایہ کاری کا حجم 1.19 ارب ڈالر رہا، جبکہ گزشتہ سال اسی مدت میں یہ حجم 1.79 ارب ڈالر تھا، اس طرح رواں مالی سال کے دوران براہ راست بیرونی سرمایہ کاری میں 59 کروڑ 85 لاکھ ڈالر کی کمی دیکھی گئی۔
تاہم فروری 2026 کے دوران براہ راست بیرونی سرمایہ کاری میں اضافہ دیکھنے میں آیا اور یہ بڑھ کر 21 کروڑ 35 لاکھ ڈالر تک پہنچ گئی، جبکہ فروری 2025 میں اس کا حجم 13 کروڑ 27 لاکھ ڈالر تھا، جو ماہانہ بنیاد پر بہتری کی نشاندہی کرتا ہے۔
اعداد و شمار کے مطابق رواں مالی سال کے ابتدائی آٹھ ماہ میں مجموعی بیرونی سرمایہ کاری کا حجم 70 کروڑ 41 لاکھ ڈالر رہا، جبکہ گزشتہ سال اسی مدت میں یہ 1.58 ارب ڈالر تھا، جس سے مجموعی سطح پر بھی سرمایہ کاری میں نمایاں کمی ظاہر ہوتی ہے۔
