وزیراعظم شہباز شریف نے گھروں کی تعمیر کے لیے قرض کی سہولت عام آدمی تک پہنچانے کے لیے عملی اقدامات تیز کرنے کی ہدایت جاری کر دی ہے، تاکہ کم آمدنی والے طبقے کو رہائش کے بہتر مواقع فراہم کیے جا سکیں۔
اسلام آباد میں وزیراعظم کی زیر صدارت وفاقی وزارت ہاؤسنگ اینڈ ورکس کے امور سے متعلق اجلاس منعقد ہوا، جس میں متعلقہ حکام نے شرکت کی اور مختلف منصوبوں پر تفصیلی بریفنگ دی گئی۔
اجلاس کے شرکاء سے گفتگو کرتے ہوئے وزیراعظم نے کہا کہ کم آمدنی والے افراد کے لیے رہائش کی فراہمی اور سستے گھروں کی تعمیر حکومت کی اولین ترجیحات میں شامل ہے، اور اس مقصد کے حصول کے لیے مؤثر اقدامات ناگزیر ہیں۔
اجلاس کو وزارت ہاؤسنگ اینڈ ورکس کے اسٹریٹجک روڈ میپ پر بریفنگ دیتے ہوئے بتایا گیا کہ تعمیراتی شعبے کے ٹیکس اسٹرکچر میں اصلاحات کی جا رہی ہیں، جبکہ ٹیکس اسٹینڈرائزیشن کے حوالے سے ایف بی آر اور صوبوں کے درمیان مشاورت جاری ہے۔
حکام نے مزید آگاہ کیا کہ ہاؤس مورٹگیج سے متعلق اصلاحات کے مسودے بھی زیر غور ہیں، تاکہ گھروں کی خریداری اور تعمیر کے عمل کو مزید آسان بنایا جا سکے۔
اجلاس میں بتایا گیا کہ پبلک پرائیویٹ پارٹنرشپ کے تحت کم آمدنی والے افراد کے لیے گھروں کی تعمیر کا جامع لائحہ عمل تیار کیا جا رہا ہے، جبکہ ریئل اسٹیٹ ریگولیٹری اتھارٹی کے قیام پر بھی کام جاری ہے۔
