قومی کرکٹ ٹیم کے فاسٹ باؤلر حارث رؤف نے فٹنس بحال ہونے کے بعد دوبارہ بولنگ کا آغاز کر دیا ہے، جس کے بعد ان کی ٹیم میں شمولیت کے امکانات مزید روشن ہو گئے ہیں۔
حارث رؤف نے نیشنل کرکٹ اکیڈمی میں باقاعدہ طور پر بولنگ شروع کی، جہاں میڈیکل پینل نے ان کی فٹنس اور کارکردگی کا تفصیلی جائزہ لیا۔ جائزے کے بعد انہیں ورلڈ کپ کے لیے سلیکشن کے حوالے سے فٹ قرار دے دیا گیا ہے۔
یاد رہے کہ ایشیا کپ کے دوران بھارت کے خلاف میچ میں حارث رؤف فٹنس مسائل کا شکار ہو گئے تھے، جہاں انہیں پسلیوں میں تکلیف محسوس ہوئی تھی جس کے باعث وہ مکمل طور پر کھیل جاری نہ رکھ سکے۔
دوسری جانب پاکستان کرکٹ بورڈ کا کہنا ہے کہ نسیم شاہ کی انجری پر مسلسل نظر رکھی جا رہی ہے اور ان کی بحالی کے لیے طبی ماہرین سے رابطہ برقرار ہے۔ نسیم شاہ کی کرکٹ میں واپسی کا حتمی فیصلہ میڈیکل رپورٹس کی روشنی میں کیا جائے گا۔
واضح رہے کہ آئی سی سی ورلڈ کپ کے آغاز میں صرف 14 روز باقی رہ گئے ہیں، تاہم پاکستان سمیت کئی بڑی ٹیموں کو کھلاڑیوں کی فٹنس سے متعلق مسائل کا سامنا ہے، اور جیسے جیسے ایونٹ قریب آ رہا ہے، ٹیموں کی مشکلات میں اضافہ ہوتا جا رہا ہے۔
