وزیراعظم شہباز شریف نے متعلقہ حکام کو ایران اور امریکا کے درمیان ممکنہ مذاکرات کی میزبانی کے حوالے سے ضروری اقدامات کرنے کی ہدایت جاری کر دی ہے، جس کا مقصد خطے میں امن و استحکام کے لیے پاکستان کے سفارتی کردار کو مؤثر بنانا ہے۔
وزیراعظم کی زیر صدارت ہونے والے اعلیٰ سطح کے اجلاس میں اعلیٰ عسکری قیادت اور وفاقی وزراء نے شرکت کی، جہاں ایران امریکا کشیدگی کے خاتمے کے لیے پاکستان کی سفارتی کوششوں اور ممکنہ مذاکراتی میزبانی کے مختلف پہلوؤں پر تفصیلی غور کیا گیا۔
اجلاس میں خلیجی جنگ کے تصفیے کے لیے پاکستان میں مذاکرات کی میزبانی کے امکانات کا بھی جائزہ لیا گیا، جبکہ نائب وزیراعظم اسحاق ڈار نے شرکاء کو پاکستان کی اب تک کی سفارتی سرگرمیوں پر بریفنگ دی۔ انہوں نے مصر، ترکیہ اور دیگر ممالک کے وزرائے خارجہ سے ہونے والے رابطوں کی تفصیلات بھی اجلاس کے سامنے رکھیں۔
ذرائع کے مطابق وزیراعظم نے کہا کہ پاکستان خطے میں امن کے قیام اور کشیدگی کے خاتمے کے لیے اپنی سفارتی کوششیں جاری رکھے گا، اور اگر فریقین آمادہ ہوئے تو پاکستان مذاکرات کی میزبانی کے لیے مکمل طور پر تیار ہے۔ انہوں نے اس بات کو بھی خوش آئند قرار دیا کہ عالمی سطح پر تنازع کے حل میں پاکستان کے کردار کو تسلیم کیا جا رہا ہے۔
ذرائع کے مطابق ایران اور امریکا کے درمیان مذاکرات کے معاملے پر وزیراعظم شہباز شریف صدر آصف علی زرداری کو بھی اعتماد میں لیں گے، جبکہ آج رات ایوان صدر میں دونوں رہنماؤں کے درمیان اہم ملاقات متوقع ہے، جس میں خطے کی موجودہ صورتحال پر تفصیلی گفتگو کی جائے گی۔
