ایچ بی ایل پی ایس ایل 11 کے اختتام پر انفرادی کارکردگی کی بنیاد پر مختلف کھلاڑیوں کو اعزازات سے نوازا گیا، جس میں پشاور زلمی کے کپتان بابر اعظم 588 رنز کے ساتھ ٹورنامنٹ کے بہترین بیٹر قرار پائے۔
بابر اعظم کو شاندار بیٹنگ کارکردگی پر گولڈن بیٹ اور حنیف محمد کیپ سے بھی نوازا گیا، جو ان کی مستقل مزاجی اور عمدہ کھیل کا اعتراف ہے۔
پشاور زلمی کے فرحان یوسف کو بہترین فیلڈر قرار دیا گیا، جبکہ اسلام آباد یونائیٹڈ کے کپتان شاداب خان کو بہترین آل راؤنڈر کا اعزاز دیا گیا، جنہوں نے بیٹنگ اور باؤلنگ دونوں شعبوں میں نمایاں کارکردگی دکھائی۔
سفیان مقیم کو پلیئر آف دی ٹورنامنٹ کا اعزاز حاصل ہوا، وہ ایونٹ کے بہترین بولر بھی رہے اور انہیں فضل محمود کیپ سے نوازا گیا، جبکہ انہوں نے پورے ٹورنامنٹ میں مجموعی طور پر 22 وکٹیں حاصل کیں۔
کوشال مینڈس کو بہترین وکٹ کیپر قرار دیا گیا، جبکہ حیدرآباد کنگز مین کے حنین شاہ کو ایمرجنگ پلیئر آف دی ٹورنامنٹ کا اعزاز دیا گیا، جس سے ان کی ابھرتی ہوئی صلاحیتوں کا اعتراف کیا گیا۔
پی ایس ایل 11 میں آصف یعقوب کو بہترین امپائر قرار دیا گیا، جبکہ حیدرآباد کنگز مین کو اسپرٹ آف دی کرکٹ ایوارڈ سے نوازا گیا، جو ٹیم کے مثبت رویے اور کھیل کے جذبے کی عکاسی کرتا ہے۔
