طبی ماہرین نے خبردار کیا ہے کہ شدید گرمی میں باہر سے گھر پہنچتے ہی فوراً ایئر کنڈیشنڈ کمرے میں داخل ہونا انسانی صحت کے لیے نقصان دہ ثابت ہو سکتا ہے، کیونکہ درجہ حرارت میں اچانک تبدیلی جسم پر منفی اثرات مرتب کرتی ہے۔
ماہرین کے مطابق انسانی جسم درجہ حرارت کو متوازن رکھنے کے لیے ایک مخصوص نظام کے تحت کام کرتا ہے۔ شدید گرمی کے دوران جسم پسینہ خارج کرکے اور خون کی نالیوں کو پھیلا کر خود کو ٹھنڈا رکھنے کی کوشش کرتا ہے، جس سے جسمانی نظام دباؤ کا شکار ہو جاتا ہے۔
ڈاکٹروں کا کہنا ہے کہ ایسے میں اگر کوئی شخص اچانک بہت ٹھنڈے ماحول میں چلا جائے تو جسم کو حرارتی جھٹکا لگ سکتا ہے، جس کے نتیجے میں سر درد، گلے کی سوزش، کھانسی اور سانس لینے میں دشواری جیسی علامات ظاہر ہو سکتی ہیں۔
ماہرین نے مشورہ دیا ہے کہ شدید دھوپ یا گرمی سے واپس آنے کے بعد فوری طور پر اے سی والے کمرے میں داخل ہونے کے بجائے چند منٹ کسی سایہ دار یا معتدل جگہ پر گزارنے چاہئیں تاکہ جسم آہستہ آہستہ درجہ حرارت کی تبدیلی کا عادی ہو سکے۔
انہوں نے کہا کہ گرمیوں میں جسم میں پانی کی کمی عام ہو جاتی ہے، جس کے باعث ٹھنڈک کے اثرات زیادہ سخت محسوس ہوتے ہیں، اس لیے پانی کا مناسب استعمال ضروری ہے تاکہ جسم میں نمی کا توازن برقرار رکھا جا سکے۔
طبی ماہرین کے مطابق ایئر کنڈیشنر کے مسلسل استعمال سے پیدا ہونے والی خشک فضا گلے کی خشکی اور جلن کا سبب بھی بن سکتی ہے، جبکہ ٹھنڈی ہوا کا براہ راست جسم پر پڑنا سانس کے مسائل اور پٹھوں میں کھنچاؤ پیدا کر سکتا ہے۔
ماہرین صحت نے شہریوں کو ہدایت کی ہے کہ گرمی اور ٹھنڈک کے درمیان توازن برقرار رکھا جائے، اے سی کا درجہ حرارت مناسب رکھا جائے اور احتیاطی تدابیر اختیار کی جائیں تاکہ مختلف طبی پیچیدگیوں سے محفوظ رہا جا سکے۔
