لاہور: لاہور کی انسداد دہشت گردی عدالت نے بانی پاکستان تحریک انصاف (پی ٹی آئی) و سابق وزیراعظم عمران خان کے خلاف درج 9 مئی کے جلاؤ گھیراؤ کے مقدمات میں ضمانت کی درخواستوں پر سماعت 2 نومبر تک ملتوی کر دی۔
انسداد دہشت گردی عدالت لاہور میں بانی پی ٹی آئی عمران خان کے خلاف 9 مئی کے جلاؤ گھیراؤ کے مقدمات میں ضمانت کی درخواستوں پر سماعت ہوئی۔
لاہور کی انسداد دہشت گردی عدالت کے جج منظر علی گل نے درخواستوں پر سماعت کرتے ہوئے وکلا کو ہدایت کی کہ وہ آئندہ سماعت پر ضمانتوں پر دلائل مکمل کریں۔
بعدازاں لاہور کی انسداد دہشتگردی کی عدالت نے سماعت 2 نومبر تک ملتوی کردی۔
بانی پی ٹی آئی نے جناح ہاؤس ،عسکری ٹاور سمیت دیگر مقدمات میں ضمانت کی درخواستیں دائر کر رکھی ہیں۔
یاد رہے کہ گزشتہ برس 9 مئی کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
