پی ٹی آئی احتساب کمیٹی کے رکن قاضی محمد انور کا کہنا ہے کہ میری بشریٰ بی بی سے کوئی ملاقات نہیں ہوئی اور نہ کوئی سازش کی ہے۔
پشاور ہائی کورٹ کے باہر میڈیا سے گفتگو کرتے ہوئے انہوں نے کہا کہ بشریٰ بی بی نے انصاف لائرز فورم میں کوئی مداخلت نہیں کی۔
قاضی محمد انور کا کہنا ہے کہ مجھ پر الزام عائد کیا گیا کہ علی زمان ایڈووکیٹ کو عہدے سے ہٹایا، بشریٰ بی بی پر من گھڑت الزامات پر مجھے افسوس ہوا ہے، میں نے 55 سال وکالت کی، کبھی دھوکا نہیں دیا اور نہ ہی جھوٹ بولا۔
انہوں نے کہا کہ ملٹری کورٹس کے فیصلوں کے خلاف گزشتہ روز اپیلیں دائر کر دی گئیں، اپیلوں میں ملٹری کورٹس کے فیصلوں کو چیلنج کیا گیا ہے۔
پی ٹی آئی احتساب کمیٹی کے رکن کا کہنا ہے کہ کرپشن میں ملوث وزراء سے پوچھ گچھ اور تحقیقات کی جا رہی ہیں، صوبائی وزیر سید قاسم علی اور مشیرِ صحت احتشام علی سے وضاحتیں طلب کی گئیں۔
