خیبر پختونخوا کے مشیر انسداد بدعنوانی مصدق عباسی نے کہا ہے کہ 190ملین پاؤنڈ ریفرنس کے اعدادوشمار ہی غلط ہیں، میرے پاس اس کے ثبوت موجود ہیں، لیکن کبھی مجھے بطور گواہ بلایا ہی نہیں گیا۔
190ملین پاؤنڈ ریفرنس کے اعدادوشمار کے حوالے سے انہوں نے بتایا کہ اول تو یہ 190 ملین نہیں بلکہ 173 ملین پاؤنڈ کا ریفرنس ہے، اس کیس کی دستاویزات میرے پاس موجود تھیں، نیب نے مجھے کبھی بھی بطور گواہ نہیں بلایا۔
مصدیق عباسی کا کہنا تھا کہ ریفرنس کے کیس میں نیب کے بنیادی اعداد و شمار ہی غلط ہیں، دوسرا مالیاتی فائدہ لیا ہو تو ثابت کرنے کے بعد ہی کیس کیا جا سکتا ہے، لیکن یہ تو حکومت کا پیسہ تھا ہی نہیں، بلکہ یہ پیسہ ذاتی تھا۔
مشیر انسداد بدعنوانی نے کہا کہ کابینہ کا پیسے کی ترسیل کے ساتھ کوئی تعلق نہیں تھا۔ اس حوالے سے انہوں نے برطانوی قانون کا حوالہ دیتے ہوئے کہا کہ برطانوی قانون کے مطابق ذاتی معاہدہ عوام کے سامنے نہیں لایا جا سکتا، بلکہ حکومت سے اس سلسلے میں گارنٹی لی جاتی ہے۔
صوبائی مشیر انسداد بدعنوانی کا کہنا تھا کہ ریفرنس میں زلفی بخاری کو بانی پی ٹی آئی کا فرنٹ مین کہنا بھی غلط ہے، جبکہ دیگر بھی لاتعداد سوالات اٹھتے ہیں اس حوالے سے ، جو ثابت کرتے ہیں کہ یہ کیس غلط ہے۔
