وزیرِ اعظم محمد شہباز شریف نے یومِ شہداءِ پولیس کے موقع پر پیغام میں کہا ہے کہ آج کے دن ہم اپنی پولیس کے بہادر افسران و جوانوں کو خراج تحسین پیش کرتے ہیں۔
وزیر اعظم کا کہنا تھا کہ پولیس کے افسران و جوان ملک کے کونے کونے میں امن و امان کے قیام کیلئے موسمی حالات کی پرواہ کئے بغیر اپنے پیاروں سے دور فرض کی ادائیگی میں سرگرم عمل رہتے ہیں، پو لیس کے جوان اپنی جانوں کو نذرانہ پیش کرتے ہیں، آج کے دن ہم اپنے شہداء کے ان عظیم اہل خانہ کو بھی سلام کرتے ہیں جو ہماری خاطر اپنا مستقبل قربان کرتے ہیں۔
وزیراعظم نے کہا کہ دہشتگردی کی جنگ میں 8 ہزار سے زائد پولیس کے افسران و جوانوں نے ارض وطن کی خاطر اپنے لہو کا نذرانہ پیش کیا،بطور فرنٹ لائن دفاعی فورس پولیس اہلکاروں نے اپنے بچوں کو یتیم کرکے ملک کے لاکھوں بچوں کو یتیمی سے بچایا، حال ہی میں رحیم یار خان میں ڈاکوؤں کے خلاف کارروائی کرتے ہوئے الیٹ فورس کے 5 جوانوں نے جام شہادت نوش کیا۔
وزیراعظم کا کہنا تھا کہ ان شہداء سمیت پولیس کے ہزاروں شہداء ہمارا فخر ہیں، پاکستان پولیس نے اپنی پیشہ ورانہ صلاحیتوں کا پوری دنیا میں لوہا منوایا،حال ہی میں ورلڈ پولیس سمٹ 2025 میں بین الاقوامی سطح پر جیتے گئے میڈل و ایوارڈز اس چیز کا منہ بولتا ثبوت ہیں، شہری امن و امان کے قیام و جرائم کی مؤثر روک تھام کیلئے پولیسنگ میں جدید ٹیکنالوجی کا استعمال خوش آئند ہے۔
شہباز شریف نے کہا کہ ٹیکنالوجی کے استعمال سے شہریوں کی حفاظت مزید مؤثر اور یقینی بنائی جا سکے گی، چاروں صوبوں میں انسداد دھشتگردی فورسز کے قیام، افواجِ پاکستان و رینجرز کے ساتھ مشترکہ کارروائیوں و تعاون، قدرتی آفات و دیگر ہنگامی صورتحال میں پولیس کا کردار کلیدی رہا ہے۔
انہوں نے کہا کہ گزشتہ برسوں میں پولیس نے دہشتگردی کی جنگ میں سینکڑوں آپریشنز کے ذریعے دشمن کے پاکستان میں بد امنی اور شر انگیزی کے ناپاک عزائم کو خاک میں ملایا، گوادر کے ساحلوں سے گلگت بلتستان کے فلک بوس پہاڑوں تک ملک کی حفاظت پر مامور پولیس کا ہر افسر جوان مجھ سمیت پوری قوم کا فخر ہے۔
دوسری جانب وزیر اعظم شہباز شریف نے مسجد اقصیٰ کی بے حرمتی کی مذمت کی ہے،ان کا کہنا تھا کہ پاکستان اسرائیلی وزرا کے قابض فوج کے سائے میں آبادکار گروہوں کے ساتھ مسجد اقصیٰ پر دھاوا بولنے کے حالیہ واقعے کی شدید مذمت کرتا ہے۔
شہباز شریف نے کہا کہ اسلام کے مقدس ترین مقامات میں سے ایک کی اس بے حرمتی نے دنیا بھر کے ایک ارب سے زائد مسلمانوں کے عقیدے کو ٹھیس پہنچائی ہے، یہ بین الاقوامی قوانین اور انسانیت کے اجتماعی ضمیر پر بھی حملہ ہے۔
خیال رہے کہ وزیر اعظم شہباز شریف آج گلگت بلتستان کا دورہ کریں گے، اپنے دورہ کے دوران وزیر اعظم گورنر، وزیر اعلیٰ گلگت بلتستان کے ساتھ ملاقات کریں گے ۔
وزیر اعظم شہباز شریف حالیہ بارشوں اور سیلاب سے پیدا ہونے والی صورتحال پر اجلاس کی صدارت بھی کریں گے، سی ایم سیکرٹریٹ میں ہونے والی تقریب میں وزیر اعظم شہباز شریف متاثرین میں چیک تقسیم کریں گے۔
