سعودی عرب میں مسجد الحرام اور مسجد نبوی ﷺ کے انتظامی امور کی نگران جنرل اتھارٹی نے عمرہ زائرین اور نمازیوں پر زور دیا ہے کہ بارش کے دوران جاری کردہ سیفٹی گائیڈ لائنز پر مکمل طور پر عمل کریں تاکہ ان کی سلامتی یقینی بنائی جا سکے۔
سعودی خبر رساں ادارے کے مطابق، ان احتیاطی ہدایات میں محفوظ جگہوں پر قیام، چھتری کے استعمال کو یقینی بنانا، موسمیاتی الرٹس پر نظر رکھنا، حکومتی ہدایات کی پیروی کرنا اور آسمانی بجلی کے دوران موبائل فون بند رکھنا شامل ہے۔ کسی بھی قسم کی رہنمائی یا اطلاع کے لیے زائرین 1966 ہیلپ لائن پر کال کر سکتے ہیں۔
یہ بات بھی قابلِ ذکر ہے کہ حرمین شریفین کی انتظامیہ، مختلف سرکاری اداروں کے ساتھ مل کر بارش کے دوران مسجد الحرام میں ہنگامی منصوبوں پر عمل درآمد کرتی ہے تاکہ عبادت کے دوران زائرین کی جان و مال کا تحفظ یقینی بنایا جا سکے۔ جنرل اتھارٹی کی ان گائیڈ لائنز کا مقصد ایک محفوظ اور منظم عبادتی ماحول کی فراہمی ہے۔
دوسری جانب، خلیجی تعاون کونسل (GCC) کے ممالک کے رہائشیوں کے لیے سعودی عرب نے ایک نئی سہولت متعارف کرائی ہے جس کے تحت اگر وہ سعودی عرب سے گزرتے ہوئے بین الاقوامی سفر پر جا رہے ہوں تو وہ مفت اسٹاپ اوور ویزا حاصل کر کے مختصر قیام کے دوران عمرہ کی سعادت حاصل کر سکتے ہیں۔
یہ سہولت صرف سعودیہ ایئرلائنز یا فلائناس کے ذریعے سفر کرنے والے افراد کو دستیاب ہے اور اسے مکہ مکرمہ یا مدینہ منورہ میں عمرہ یا زیارت جیسے مذہبی مقاصد کے لیے استعمال کیا جا سکتا ہے۔
اس خصوصی ویزا کے تحت مسافروں کو 96 گھنٹے (یعنی چار دن) تک سعودی عرب میں قیام کی اجازت حاصل ہوگی۔ ویزا اگرچہ مفت ہے، تاہم صرف پراسیسنگ اور لازمی میڈیکل انشورنس کے لیے معمولی فیس لی جاتی ہے۔
