پاکستان میں ہفتہ وار مہنگائی کی شرح میں معمولی اضافہ، سالانہ شرح 1.73 فیصد تک جا پہنچی.
ادارہ شماریات کی تازہ رپورٹ کے مطابق ملک میں ہفتہ وار مہنگائی کی مجموعی شرح میں 0.05 فیصد کا معمولی اضافہ ریکارڈ کیا گیا ہے، جب کہ سالانہ بنیاد پر مہنگائی کی شرح 1.73 فیصد تک پہنچ گئی ہے۔
اعداد و شمار کے مطابق گزشتہ ہفتے کے دوران 12 اشیائے خورونوش اور ضروریاتِ زندگی کی قیمتوں میں اضافہ ہوا، 12 اشیاء کی قیمتوں میں کمی ریکارڈ کی گئی، جب کہ 27 اشیاء کی قیمتیں مستحکم رہیں۔ رپورٹ میں بتایا گیا ہے کہ اسلام آباد، راولپنڈی اور لاہور میں چینی 173 روپے فی کلو تک فروخت ہو رہی ہے۔
مہنگی ہونے والی اشیاء میں سب سے زیادہ اضافہ پیاز کی قیمت میں ہوا، جو 16.53 فیصد بڑھ گئی۔ ٹماٹر کی قیمت میں 10.17 فیصد اور مرغی کی قیمت میں 4.12 فیصد اضافہ ہوا۔ اسی طرح انڈے، دال مسور، چائے، تازہ دودھ، ڈیزل، سگریٹ اور لکڑی کی قیمتوں میں بھی اضافہ ریکارڈ کیا گیا۔
ادارہ شماریات کے مطابق جن اشیاء کی قیمتوں میں کمی ہوئی، ان میں کیلے، دال مونگ، ماش، آلو، چینی، لہسن، چاول، آٹا، ایل پی جی اور پیٹرول شامل ہیں۔
