پاکستان تحریک انصاف کے بانی اور سابق وزیراعظم عمران خان کے خلاف جاری نیب ریفرنس میں جائیداد کی نیلامی کے حوالے سے اہم پیش رفت سامنے آئی ہے۔ اسسٹنٹ کمشنر سیکریٹریٹ کی جانب سے باضابطہ نیلامی کا اشتہار جاری کر دیا گیا ہے، جبکہ پی ٹی آئی کے سیکریٹری جنرل سلمان اکرم راجا نے بنی گالہ رہائش گاہ کی مبینہ نیلامی کی خبر پر ردعمل دیتے ہوئے اسے اچانک سامنے آنے والا معاملہ قرار دیا ہے۔
اشتہار کے مطابق نیلامی نیب ریفرنس کے سلسلے میں یونین کونسل بہارہ کہو میں منعقد ہوگی، جہاں عمران خان کی موضع موہڑہ نور میں واقع جائیداد کو فروخت کے لیے پیش کیا جائے گا۔ اس جائیداد میں 248 کنال 8 مرلے اور 405 کنال 3 مرلے رقبہ شامل ہے۔
نیلامی میں حصہ لینے کے خواہشمند افراد کو 50 لاکھ روپے کا پے آرڈر چیئرمین نیب کے نام پر جمع کرانا ہوگا۔ علاوہ ازیں، دلچسپی رکھنے والے افراد نیلامی سے قبل متعلقہ جائیداد کا معائنہ بھی کر سکتے ہیں۔ اشتہار میں واضح کیا گیا ہے کہ نیلامی میں شریک ہونے والوں کو تمام ضروری معلومات پٹواری فراہم کرے گا، اور یہ عمل ایویلیوایشن کمیٹی کی منظور شدہ شرائط و ضوابط کے تحت مکمل کیا جائے گا۔ نیلامی آج ہی موضع بہارہ کہو میں منعقد ہونے کا شیڈول ہے۔
دوسری جانب، پی ٹی آئی کے سیکریٹری جنرل سلمان اکرم راجا نے اپنے بیان میں کہا کہ بانی پی ٹی آئی کی بنی گالہ رہائش گاہ کی مبینہ نیلامی کی خبر آج ہی منظر عام پر آئی ہے، اور اگر ایسا ہے تو یہ کسی خفیہ کارروائی کا نتیجہ ہوسکتا ہے۔ انہوں نے مزید کہا کہ بنی گالہ کے منتظمین اس حوالے سے لاعلم ہیں، تاہم پارٹی کی قانونی ٹیم معاملے کی مکمل تحقیقات کر رہی ہے اور جلد حقائق سامنے آجائیں گے۔
بعد ازاں، اپنی ایک اور پوسٹ میں سلمان اکرم راجا نے وضاحت دی کہ قانونی ٹیم کے مطابق نیب ریفرنس نمبر 19/2023، جسے عام طور پر القادر ٹرسٹ کیس کہا جاتا ہے، میں دیگر ملزمان کو پہلے ہی مفرور اور اشتہاری قرار دیا جا چکا ہے۔ آج شائع ہونے والا نیلامی نوٹس انہی ملزمان کی جائیداد سے متعلق ہے۔ ان کا کہنا تھا کہ پارٹی اس معاملے پر مسلسل نظر رکھے ہوئے ہے۔
