کراچی: شہر قائد کے مختلف علاقوں میں صبح سویرے کہیں بوندا باندی اور کہیں ہلکی بارش نے موسم خوشگوار بنا دیا۔ شہریوں نے ٹھنڈی ہوا اور ہلکی پھوار سے لطف اٹھایا، تاہم نشیبی علاقوں میں پانی جمع ہونا شروع ہوگیا جس سے لوگوں کو مشکلات کا سامنا ہے۔
رپورٹس کے مطابق صدر، آئی آئی چندریگر روڈ، شاہراہِ فیصل، ڈیفنس، قیوم آباد، کورنگی روڈ، برنس روڈ، ایم اے جناح روڈ، گلستان جوہر، ناظم آباد اور گلشن اقبال سمیت کئی علاقوں میں ہلکی بارش ریکارڈ کی گئی۔ اس کے علاوہ یونیورسٹی روڈ، محمود آباد، منظور کالونی اور بلوچ کالونی کے اطراف میں بھی بارش ہوئی۔
محکمہ موسمیات نے پیش گوئی کی ہے کہ کراچی میں اگلے دو روز تک گرج چمک کے ساتھ تیز بارش ہو سکتی ہے۔ محکمے نے خبردار کیا ہے کہ موسلادھار بارش کی صورت میں نشیبی علاقے زیرِ آب آ سکتے ہیں اور شہریوں کو احتیاطی تدابیر اختیار کرنے کی ہدایت کی ہے۔
دوسری جانب سندھ کے دیگر شہروں میں بھی مون سون کا شدید اسپیل جاری ہے۔ حیدرآباد، سجاول، ٹھٹہ، سکھر، اوباڑو، ڈہرکی، میرپور ماتھیلو اور نوشہروفیروز سمیت کئی شہروں میں تیز بارش ہوئی، جس سے معمولاتِ زندگی متاثر ہوئے۔
محکمہ موسمیات کے مطابق سندھ کے مختلف شہروں میں اگلے دو روز کے دوران مزید موسلادھار بارشوں کا امکان ہے۔ خاص طور پر 10 ستمبر تک تھرپارکر، عمرکوٹ، میرپور خاص، سانگھڑ، خیرپور اور شہید بے نظیر آباد میں شدید بارشیں متوقع ہیں، جس کے باعث مقامی انتظامیہ کو الرٹ رہنے کی ہدایت کی گئی ہے۔
