کراچی: وزیراعلیٰ سندھ سید مراد علی شاہ نے کہا ہے کہ حالیہ بارشوں کے بعد کچھ ’’برساتی مینڈک‘‘ سامنے آ گئے ہیں جو جھوٹی اور بے بنیاد افواہیں پھیلا کر عوام کو گمراہ کرنے کی کوشش کر رہے ہیں۔
بانی پاکستان محمد علی جناح کے یومِ وفات کے موقع پر مزارِ قائد پر میڈیا سے گفتگو کرتے ہوئے انہوں نے کہا کہ پاکستان بانیٔ پاکستان قائداعظم کی انتھک جدوجہد کا نتیجہ ہے۔ اب وقت آ گیا ہے کہ ان کے اصول ایمان، اتحاد اور قربانی کو اپنا کر ملک کو حقیقی اسلامی فلاحی ریاست بنایا جائے۔
وزیراعلیٰ نے سابق وزرائے اعظم ذوالفقار علی بھٹو اور بے نظیر بھٹو کو خراجِ عقیدت پیش کرتے ہوئے کہا کہ دونوں رہنماؤں نے پاکستان کے دفاع اور ایٹمی پروگرام کے لیے لازوال کردار ادا کیا۔ انہوں نے کہا کہ بھارت کی جارحیت کا جواب ہمیشہ پاکستان کی مسلح افواج اور عوام نے یکجہتی کے ساتھ دیا اور یہی اتحاد ہماری اصل طاقت ہے۔
مراد علی شاہ نے کشمیری عوام پر بھارتی مظالم اور فلسطین میں اسرائیلی بمباری کی مذمت کرتے ہوئے کہا کہ معصوم بچوں اور نہتے شہریوں پر حملے کرنے والا اسرائیل مسلم دنیا کی یکجہتی کے باعث ناکام ہوگا۔
سیلابی صورتحال پر بات کرتے ہوئے ان کا کہنا تھا کہ سندھ سمیت کئی علاقے متاثر ہیں اور حکومت کی اولین ترجیح انسانی جانوں کو محفوظ بنانا اور بیراجوں و بندوں کو بچانا ہے۔ انہوں نے کچے کے رہائشیوں سے اپیل کی کہ وہ حکومت کی ہدایات پر عمل کریں تاکہ جانی نقصان سے بچا جا سکے۔
انہوں نے مزید بتایا کہ چیئرمین بلاول بھٹو زرداری کی ہدایت پر فوری ریلیف سرگرمیاں شروع کر دی گئی ہیں، زرعی اور ماحولیاتی ایمرجنسی نافذ کی جا رہی ہے اور عالمی سطح پر امداد کے لیے فلیش اپیل بھی کی جائے گی۔
کراچی میں اربن فلڈنگ پر ہونے والی تنقید کا جواب دیتے ہوئے وزیراعلیٰ نے کہا کہ بارش کے بعد افواہیں پھیلانے والے ’’برساتی مینڈک‘‘ سیاسی اور لسانی تفریق پیدا کرنے کی کوشش کرتے ہیں، مگر قوم پہلے ہی اس کی بھاری قیمت ادا کر چکی ہے۔
مراد علی شاہ نے تسلیم کیا کہ کچھ کوتاہیاں ضرور سامنے آئیں لیکن انتظامیہ اور عوامی نمائندے سڑکوں پر موجود رہے اور اپنی ذمہ داریاں ادا کرتے رہے۔ ان کا کہنا تھا کہ پیپلز پارٹی ہر اس منصوبے کی حمایت کرے گی جو عوامی مسائل کے حل کے لیے ہو اور پانی کے مسئلے پر غیر متنازع ہو۔
