وزیر اعظم شہباز شریف نے کہا ہے کہ پاکستان بہت جلد اپنی تمام مشکلات پر قابو پا لے گا، تاہم توانائی کے شعبے میں گردشی قرضوں کا ازالہ اب بھی ایک بڑا چیلنج ہے۔
ایک تقریب سے خطاب کرتے ہوئے وزیر اعظم نے کہا کہ گردشی قرضے کی وجہ سے توانائی کا پورا شعبہ متاثر ہو رہا تھا اور یہ قرضہ نہ صرف تیزی سے بڑھ رہا تھا بلکہ قومی وسائل کو بھی مسلسل نگل رہا تھا۔ انہوں نے کہا کہ آئی پی پیز کے ساتھ مذاکرات اور اس مسئلے کا حل ایک مشکل مرحلہ تھا، تاہم وزیر توانائی کی سربراہی میں قائم ٹاسک فورس نے بہترین کارکردگی دکھائی۔
شہباز شریف نے کہا کہ گردشی قرضوں کے مسئلے کے حل کا کریڈٹ موجودہ حکومت کو جاتا ہے اور اس سلسلے میں فیلڈ مارشل کی کاوشیں بھی قابلِ تعریف ہیں۔
انہوں نے مزید بتایا کہ حالیہ دنوں میں آئی ایم ایف حکام سے ملاقات ہوئی جس میں ایم ڈی آئی ایم ایف نے پاکستان کی معیشت میں بہتری اور حکومتی اصلاحات کو سراہا۔
وزیر اعظم نے کہا کہ محنت اور عزم سے کام کیا جائے تو کامیابی یقینی ہے۔ اگلا مرحلہ کمپنیوں کی نجکاری اور نقصانات کا ازالہ ہے۔ ان کے مطابق پاکستان تمام مشکلات سے جلد نکلے گا اور معاشی بحالی کی راہ پر گامزن ہوگا۔
