وزیراعلیٰ خیبر پختونخوا سہیل آفریدی اڈیالہ جیل میں بانی پی ٹی آئی سے ملاقات کے لیے سرکاری پروٹوکول کے ہمراہ پہنچے، تاہم پولیس نے انہیں جیل کے قریب موجود سخت سیکیورٹی ناکے پر آگے جانے سے روک دیا۔ وزیراعلیٰ کا قافلہ جوں ہی داہگل ناکے کے قریب پہنچا تو وہاں موجود بھاری پولیس نفری نے انہیں مزید آگے بڑھنے کی اجازت نہیں دی، جس کے باعث ان کا پورا قافلہ وہیں رک گیا۔
تفصیلات کے مطابق وزیراعلیٰ سہیل آفریدی بانی پی ٹی آئی سے ملاقات کے لیے خصوصی طور پر جیل آئے تھے اور ان کے ہمراہ مینا خان سمیت دیگر پارٹی رہنما بھی موجود تھے۔ تاہم سخت سیکیورٹی اور انتظامیہ کے فیصلے کے باعث وزیراعلیٰ کے قافلے کو اڈیالہ جیل جانے کی اجازت نہ مل سکی، جس کے بعد علاقہ صورتحال چند لمحوں کے لیے مزید حساس ہو گئی۔
پولیس حکام کا کہنا ہے کہ ناکے پر تعینات بھاری نفری کو ہدایات دی گئی تھیں کہ جیل کے اطراف میں غیر مجاز افراد یا قافلوں کو آگے جانے کی اجازت نہ دی جائے، جس کے تحت وزیراعلیٰ خیبر پختونخوا کے قافلے کو بھی روکا گیا۔ جیل انتظامیہ کی جانب سے تاحال اس بارے میں کوئی باضابطہ وضاحت سامنے نہیں آئی کہ وزیراعلیٰ کو ملاقات کی اجازت کیوں فراہم نہ کی گئی۔
