وزیراعظم شہباز شریف دو روزہ سرکاری دورے پر بحرین کے دارالحکومت منامہ پہنچ گئے، جہاں بحرینی قیادت نے ایئرپورٹ پر ان کا پُرتپاک استقبال کیا۔ دورہ دونوں ممالک کے درمیان تزویراتی شراکت داری اور باہمی تعاون کو مزید گہرائی دینے کے لیے اہم قرار دیا جا رہا ہے۔
وزارت خارجہ کے مطابق ایئرپورٹ پر بحرین کے ولی عہد، نائب سپریم کمانڈر اور وزیراعظم شہزادہ سلمان بن حمد الخلیفہ، اعلیٰ عسکری اور سرکاری حکام کے ہمراہ موجود تھے۔ وزیراعظم کے ہمراہ آنے والے وفد میں نائب وزیراعظم و وزیر خارجہ اسحٰق ڈار، وزیر داخلہ محسن نقوی، وزیر اطلاعات عطا اللہ تارڑ، وزیر مملکت بلال اظہر کیانی اور سینئر افسران شامل ہیں۔
سرکاری دورے کے دوران وزیراعظم شہباز شریف کی بحرین کے بادشاہ شاہ حمد بن عیسیٰ الخلیفہ، ولی عہد و وزیراعظم شہزادہ سلمان بن حمد الخلیفہ، نائب وزیراعظم شیخ خالد بن عبداللہ الخلیفہ سمیت بحرین کی اعلیٰ قیادت سے اہم ملاقاتیں اور تبادلہ خیال ہوگا۔ ان ملاقاتوں میں باہمی شراکت داری، سرمایہ کاری، تجارتی تعاون، علاقائی روابط اور عوامی سطح پر تعلقات کے فروغ سے متعلق امور زیرِ بحث آئیں گے۔
ترجمان دفتر خارجہ کے مطابق اس دورے کا بنیادی مقصد پاکستان اور بحرین کے درمیان ’’نتائج پر مبنی‘‘ اور تزویراتی شراکت داری کو مضبوط بنانا ہے۔ ترجمان نے کہا کہ یہ دورہ دونوں ممالک کے درمیان روایتی گرمجوشی، اعتماد اور خوشگوار تعلقات کو مزید تقویت دے گا، جبکہ نئی شراکت داری کے راستوں کو بھی ہموار کرے گا۔
دفتر خارجہ نے مزید کہا کہ عوامی سطح کے رابطوں میں وسعت، دونوں ممالک کے درمیان تعاون کو مزید مضبوط کرے گی اور باہمی مفاد کے شعبوں میں ترقی کے نئے مواقع پیدا ہوں گے۔
