کراچی میں سونے کی قیمت میں مسلسل اضافے کا رجحان برقرار ہے اور سونے کے نرخ ایک نئی تاریخی سطح پر پہنچ گئے ہیں۔ آل پاکستان جیمز اینڈ جیولرز ایسوسی ایشن کے مطابق فی تولہ سونا 8 ہزار 500 روپے کے نمایاں اضافے کے بعد 4 لاکھ 70 ہزار 862 روپے کی سطح پر پہنچ گیا ہے۔
اسی طرح 10 گرام سونے کی قیمت میں بھی 7 ہزار 288 روپے کا اضافہ ریکارڈ کیا گیا، جس کے بعد اس کی نئی قیمت 4 لاکھ 3 ہزار 688 روپے ہو گئی ہے، جو ملکی تاریخ میں پہلی بار 4 لاکھ روپے سے تجاوز کر گئی ہے۔
عالمی منڈی میں بھی سونے کی قیمتوں میں نمایاں اضافہ دیکھا گیا ہے، جہاں فی اونس سونا 85 ڈالر کے اضافے کے ساتھ 4 ہزار 485 ڈالر پر جا پہنچا ہے۔ یاد رہے کہ گزشتہ روز بھی فی تولہ سونے کی قیمت میں 6 ہزار 200 روپے کا اضافہ ریکارڈ کیا گیا تھا، جس کے نتیجے میں ملکی اور بین الاقوامی سطح پر سونے کی قیمتیں بلند ترین سطح پر پہنچ چکی ہیں۔
