ایران نے عارضی طور پر بند کی گئی اپنی فضائی حدود دوبارہ کھول دی ہیں۔ امریکی اور ایرانی کشیدگی کے تناظر میں ایران نے کچھ وقت کے لیے ہر قسم کی پروازوں کے لیے اپنی فضائی حدود بند کر دی تھی، جس کے باعث فضائی آمد و رفت متاثر ہوئی۔
ذرائع کے مطابق اس دوران مخصوص اجازت کے تحت صرف بین الاقوامی پروازوں کو فضائی راستہ استعمال کرنے کی اجازت دی گئی، جبکہ دیگر پروازوں کے لیے پابندیاں برقرار رہیں۔ غیر ملکی میڈیا رپورٹس میں بتایا گیا ہے کہ ایران نے تقریباً پانچ گھنٹے تک فضائی حدود بند رکھنے کے بعد فضائی ٹریفک بحال کر دی۔
فضائی حدود کی بندش کے نتیجے میں متعدد پروازوں کے شیڈول متاثر ہوئے اور فلائٹ آپریشن میں مختلف نوعیت کی رکاوٹیں سامنے آئیں، جس سے مسافروں کو مشکلات کا سامنا کرنا پڑا۔
دوسری جانب ایک جرمن ایئرلائن نے اسرائیل کے لیے رات کے اوقات میں پروازیں معطل کرنے کا اعلان کیا ہے، جو 19 جنوری تک بند رہیں گی۔ اسی تناظر میں امریکا پہلے ہی اپنی کمرشل پروازوں کو ایرانی فضائی حدود کے استعمال سے روک چکا ہے۔
