کراچی: شہر کے مختلف علاقوں میں تیز ہواؤں کے ساتھ بارش ہوئی جبکہ بعض مقامات پر ژالہ باری بھی ریکارڈ کی گئی، جس کے باعث موسم خوشگوار ہونے کے ساتھ ساتھ شہریوں کو بعض مشکلات کا بھی سامنا کرنا پڑا۔
بارش کے بعد یونیورسٹی روڈ پر سمامہ شاپنگ مال کے سامنے سڑک پر پانی جمع ہو گیا، جس سے ٹریفک کی روانی متاثر ہوئی اور گاڑیوں کی لمبی قطاریں دیکھنے میں آئیں۔ شہریوں کو آمد و رفت میں دشواری پیش آئی جبکہ کچھ علاقوں میں گاڑیوں کی رفتار سست ہو گئی۔
اسی طرح یونیورسٹی روڈ سے گلستانِ جوہر جانے والی سڑک پر گڑھوں کے باعث پانی کھڑا ہو گیا، جس سے شہریوں کو سفر کے دوران مشکلات کا سامنا کرنا پڑ رہا ہے۔ انتظامیہ کی جانب سے نکاسیٔ آب کے لیے اقدامات کیے جا رہے ہیں تاکہ ٹریفک کی روانی کو بحال کیا جا سکے۔
دوسری جانب ملیر ہالٹ، رفاہِ عام اور ملحقہ علاقوں میں کہیں ہلکی اور کہیں تیز بارش ریکارڈ کی گئی، جبکہ وقفے وقفے سے تیز ہوائیں بھی چلتی رہیں۔ ملیر کینٹ میں تیز بارش کے ساتھ ژالہ باری بھی دیکھنے میں آئی، جبکہ گلستانِ جوہر میں بھی بعض مقامات پر ژالہ باری کی اطلاعات موصول ہوئیں۔
اسی طرح سکیم 33 اور اطراف کے علاقوں میں بارش کے دوران ژالہ باری ریکارڈ کی گئی، جبکہ گلشنِ جمال اور قریبی علاقوں میں بھی بارش کے ساتھ ژالہ باری کے واقعات سامنے آئے، جس سے شہریوں نے موسم میں اچانک تبدیلی محسوس کی۔
