سندھ حکومت نے ہوائی اڈے پر مسافروں کو لینے اور چھوڑنے کیلئے آنے والے افراد کی تعداد محدود کرنے کا فیصلہ کرتے ہوئے دو سے زائد افراد کے آنے پر پابندی عائد کر دی ہے۔ اس اقدام کا مقصد سکیورٹی انتظامات کو مؤثر بنانا اور غیر ضروری رش کو کنٹرول کرنا بتایا گیا ہے۔
صوبائی وزیر داخلہ کی سربراہی میں سکیورٹی خطرات سے متعلق ایک اہم اجلاس منعقد ہوا، جس میں داخلہ سیکرٹری، انسپکٹر جنرل سندھ اور دیگر متعلقہ حکام نے موجودہ سکیورٹی صورتحال پر تفصیلی بریفنگ دی۔ اجلاس میں ماضی کے واقعات اور ممکنہ خطرات کا جائزہ لیا گیا۔
اجلاس کے دوران وزیر داخلہ نے کہا کہ سابقہ واقعات کو مدنظر رکھتے ہوئے سخت اور فوری اقدامات ناگزیر ہیں۔ انہوں نے ہدایت کی کہ کسی بھی ہنگامی صورتحال سے نمٹنے کیلئے جامع طریقۂ کار ترتیب دیا جائے اور ہوائی اڈے پر سکیورٹی کو ہر سطح پر مزید مضبوط کیا جائے۔ ان کا کہنا تھا کہ غیر معمولی رش کے باعث سکیورٹی خدشات میں اضافہ ہو سکتا ہے، اس لیے پک اینڈ ڈراپ پوائنٹ پر صرف ایک یا دو افراد کو آنے کی اجازت دی جائے گی۔
وزیر داخلہ ضیا لنجار نے پولیس کو ہدایت کی کہ دیگر قانون نافذ کرنے والے اداروں کے ساتھ رابطہ کاری کو مزید مؤثر بنایا جائے۔ انہوں نے صوبے کی تمام جیلوں میں جدید تلاشی آلات کی دستیابی یقینی بنانے اور داخلی و خارجی راستوں پر خواتین کی تلاشی کیلئے خاتون عملہ تعینات کرنے کی بھی ہدایت کی۔
انہوں نے مزید کہا کہ تمام اہم اور حساس تنصیبات کا سکیورٹی آڈٹ کیا جائے، اسلحے کی نمائش کے خلاف بلا امتیاز کارروائی عمل میں لائی جائے اور قومی عملی منصوبے کی تمام شقوں پر اس کی اصل روح کے مطابق مکمل عمل درآمد یقینی بنایا جائے۔
