ڈسٹرکٹ اینڈ سیشن کورٹ اسلام آباد نے عدم حاضری کے باعث وزیرِ اعلیٰ خیبر پختونخوا سہیل آفریدی کے ناقابلِ ضمانت وارنٹ گرفتاری جاری کر دیے ہیں۔
یہ کارروائی ریاستی اداروں پر الزامات سے متعلق درج مقدمے کی سماعت کے دوران کی گئی جس کی سماعت سول جج عباس شاہ نے کی۔ سماعت کے دوران عدالت کو بتایا گیا کہ ملزم پیش نہیں ہوئے جس پر عدالت نے سخت برہمی کا اظہار کیا۔
عدالت نے حکم دیا کہ سہیل آفریدی کو گرفتار کر کے آئندہ سماعت پر عدالت کے سامنے پیش کیا جائے تاکہ کیس کی کارروائی کو آگے بڑھایا جا سکے۔
عدالت نے مزید سماعت 26 مارچ تک ملتوی کرتے ہوئے متعلقہ اداروں کو عدالتی احکامات پر عمل درآمد کی ہدایت بھی جاری کر دی۔
واضح رہے کہ سہیل آفریدی کے خلاف پیکا ایکٹ کے تحت این سی سی آئی اے نے مقدمہ درج کر رکھا ہے جس میں ریاستی اداروں کے خلاف مبینہ الزامات کا معاملہ زیرِ سماعت ہے۔
