کراچی کے مختلف علاقوں میں تیز ہواؤں کے ساتھ موسلا دھار بارش کا سلسلہ شروع ہو گیا ہے، جس کے باعث شہر کے کئی علاقوں میں صورتحال متاثر ہوئی ہے۔
آئی آئی چندریگر روڈ، صدر، شادمان ٹاؤن، گلشن معمار، احسن آباد، نارتھ کراچی، پاور ہاؤس چورنگی، اورنگی ٹاؤن، نارتھ ناظم آباد، اولڈ سٹی ایریا، ملیر ہالٹ، رفاہ عام اور ملحقہ علاقوں میں شدید بارش ریکارڈ کی گئی، جبکہ ماڑی پور میں ژالہ باری بھی دیکھی گئی ہے۔
کمشنر کراچی سید حسن نقوی نے جاری بیان میں تمام متعلقہ افسران کو ہدایت دی ہے کہ وہ فیلڈ میں موجود رہیں اور صورتحال کی مسلسل نگرانی کریں تاکہ کسی بھی ہنگامی صورتحال سے فوری نمٹا جا سکے۔
ترجمان کمشنر کراچی کے مطابق بارشوں کے پیش نظر تمام ڈپٹی کمشنرز کو الرٹ کر دیا گیا ہے، جبکہ کمشنر کی ہدایت پر شہریوں کی سہولت کے لیے ریلیف کیمپس بھی قائم کر دیے گئے ہیں۔
ترجمان نے مزید بتایا کہ بارشوں سے نمٹنے کے لیے تمام ضروری اقدامات کیے جا چکے ہیں، کنٹرول روم مکمل طور پر فعال ہے، اور شہری کسی بھی ہنگامی صورتحال میں ریسکیو ہیلپ لائن 1299 پر رابطہ کر سکتے ہیں۔
