کے الیکٹرک سمیت ملک بھر کے بجلی صارفین کو سہ ماہی ایڈجسٹمنٹ کی مد میں تقریباً 63 ارب 94 کروڑ روپے کے بڑے مالی ریلیف ملنے کا امکان ظاہر کیا گیا ہے، جس سے صارفین کے بجلی بلوں میں نمایاں کمی آنے کی توقع کی جا رہی ہے۔
نیپرا کے اعلامیے کے مطابق بجلی تقسیم کار کمپنیوں نے کیلنڈر سال 2026 کی پہلی سہ ماہی، یعنی جنوری سے مارچ تک کی ایڈجسٹمنٹ درخواست جمع کرا دی ہے، جس پر 19 مئی کو باقاعدہ سماعت کی جائے گی، جہاں مختلف مالی معاملات کا جائزہ لیا جائے گا۔
درخواست میں مؤقف اختیار کیا گیا ہے کہ کیپسٹی چارجز کی مد میں 36 ارب 83 کروڑ 70 لاکھ روپے کی کمی ریکارڈ کی گئی ہے، جبکہ سسٹم کے استعمال کے چارجز اور مارکیٹ آپریشن فیس میں بھی مجموعی طور پر 11 ارب 24 کروڑ روپے کی کمی سامنے آئی ہے۔
اسی طرح انکریمنٹل یونٹس کی مد میں مزید 23 ارب 51 کروڑ روپے کی کمی کی درخواست بھی شامل کی گئی ہے، جس کے باعث بجلی صارفین کو مجموعی طور پر بڑے ریلیف کی توقع پیدا ہو گئی ہے۔
اعلامیے کے مطابق اس حوالے سے حتمی فیصلہ نیپرا کی سماعت کے بعد کیا جائے گا، جس کے بعد یہ طے ہوگا کہ صارفین کو کس حد تک ریلیف منتقل کیا جائے گا اور اس کے اثرات بجلی کے بلوں پر کس انداز میں مرتب ہوں گے۔
