بالی ووڈ کے دبنگ سٹار سلمان خان کے خواتین کے لباس سے متعلق بیان پرایک نئی بحث چھڑ گئی ۔
سلمان خان نے ایک انٹرویو میں خواتین کے لباس کے بارے میں اپنے خیالات کا اظہار کرتے ہوئے کہا ہے کہ عورت کا جسم جتنا ڈھکا رہے اتنا اچھا ہے۔
سلمان خان ایک پروگرام’’آپ کی عدالت‘‘میں شریک تھے، جب میزبان نے ان سے سوال کیا کہ انہوں نے اپنی فلم ’’کسی کا بھائی کسی کی جان‘‘ کے سیٹ پر خواتین کو ڈیسنٹ لباس پہننے کی تلقین کیوں کی جبکہ وہ خود شرٹ اتارنے میں ایک منٹ بھی نہیں لگاتے۔
اس سوال کے جواب میں سلمان خان کا کہنا تھا کہ آج کل کا ماحول تھوڑا عجیب سا ہے، یہ لڑکیوں کا چکر نہیں بلکہ لڑکوں کا چکر ہے، جس حساب سے لڑکے لڑکیوں کو دیکھتے ہیں وہ مجھے اچھا نہیں لگتا۔
انہوں نے مزید کہا کہ جب آپ ایک ڈیسنٹ فلم بناتے ہو تو سب فیملی کے ساتھ جاکر دیکھتے ہیں،کوشش ہے کہ جب ہم فلم بنائیں تو لڑکوں کو یہ موقع نہ دیں کہ وہ ہماری ہیروئنز اور عورتوں کو غلط نظر سے نہ دیکھ سکیں،وہ چاہتے ہیں کہ خواتین کو عزت اور وقار کے ساتھ پیش کیا جائے۔
سلمان خان کے اس بیان پر مختلف ردعمل سامنے آئے ہیں،کچھ لوگوں نے ان کی اس بات کی حمایت کی ہے ،سوشل میڈیا صارفین کا کہنا ہے کہ سلمان خان نے ایک اچھا پیغام دیا ہے، دوسری جانب کچھ لوگوں کا کہنا ہے کہ سلمان خان کو خواتین کے لباس کے بارے میں تبصرہ کرنے کا کوئی حق نہیں ہے،خواتین کو خود فیصلہ کرنے کا حق ہے کہ وہ کیا پہنتی ہیں۔
