لاس اینجلس: ہالی وڈ کی مشہور و معروف اور آسکر ایوارڈ جیتنے والی اداکارہ ڈائنا کیٹن 79 سال کی عمر میں انتقال کر گئیں۔ خاندانی ترجمان نے میڈیا کو تصدیق کرتے ہوئے بتایا کہ اداکارہ کا انتقال ہفتے کے روز امریکی ریاست کیلیفورنیا میں ہوا۔ ڈائنا کیٹن نے اپنے طویل اور کامیاب فنی سفر کے دوران معروف فلم ساز ووڈی ایلن کے ساتھ متعدد مقبول فلموں میں کام کیا جس نے انہیں عالمی شہرت بخشی۔
ڈائنا کیٹن کا اصل نام ڈیان ہال تھا۔ وہ 1946 میں لاس اینجلس میں پیدا ہوئیں اور چار بہن بھائیوں میں سب سے بڑی تھیں۔ ان کے والد سول انجینئر جبکہ والدہ گھریلو خاتون تھیں جنہوں نے اپنی تخلیقی صلاحیتوں سے بیٹی کی شخصیت اور فن پر گہرا اثر چھوڑا۔
ڈائنا کیٹن کو اداکاری اور کہانیاں سنانے کا شوق بچپن ہی سے تھا۔ انہوں نے 1960 کی دہائی کے آخر میں تھیٹر اور ٹیلی ویژن سے اپنے فنی سفر کا آغاز کیا۔ تاہم انہیں عالمی سطح پر اصل شہرت 1972 میں فرانسس فورڈ کوپولا کی شہرہ آفاق فلم ’گاڈ فادر‘ میں کے ایڈمز کا کردار ادا کرنے پر ملی۔ یہ فلم نہ صرف تاریخ کی کامیاب ترین فلموں میں شمار کی جاتی ہے بلکہ اسے اکیڈمی ایوارڈ برائے بہترین فلم سے بھی نوازا گیا۔
ڈائنا کیٹن نے اپنی انفرادیت، بے مثال اداکاری اور پراثر انداز کے باعث دنیا بھر میں اپنی ایک الگ پہچان بنائی۔
