برطانیہ میں رمضان المبارک کے آغاز کے ساتھ ہی سپر مارکیٹس نے مسلم کمیونٹی کو ریلیف دینے کے لیے اشیائے خورونوش کی قیمتوں میں نمایاں کمی کردی ہے۔
اس اقدام کا مقصد رمضان کے دوران بڑھتی ہوئی ضروریات کے پیش نظر صارفین کو سہولت فراہم کرنا ہے۔
خبر ایجنسی کے مطابق رمضان کی آمد پر 10 کلو آٹے کے تھیلے کی قیمت تقریباً آدھی کردی گئی ہے، جس کے بعد یہ صارفین کے لیے پہلے کے مقابلے میں زیادہ سستی دستیاب ہے۔ اسی طرح ساڑھے 12 پاؤنڈ مالیت والا آٹے کا تھیلا اب صرف 6 پاؤنڈ 25 پینس میں فروخت کیا جا رہا ہے۔
دوسری جانب چاول کی قیمتوں میں بھی نمایاں کمی کی گئی ہے، جہاں 10 کلو چاول کے تھیلے پر 5 پاؤنڈ تک کی بچت دی جا رہی ہے۔ اس کے علاوہ 5 کلو چاول کے تھیلے پر بھی 3 پاؤنڈ تک رعایت فراہم کی گئی ہے۔
یہ رعایتی اقدامات رمضان المبارک کے دوران مسلم خاندانوں کو معاشی سہولت فراہم کرنے اور ان کی ضروریات کو مدنظر رکھتے ہوئے کیے گئے ہیں، جسے کمیونٹی کی جانب سے مثبت اقدام قرار دیا جا رہا ہے۔
