رمضان المبارک کے دوران ملک کے میدانی علاقوں میں گرمی کی شدت برقرار رہنے کا امکان ظاہر کیا گیا ہے جبکہ بالائی علاقوں میں چند روز نسبتاً ٹھنڈے رہنے کی پیشگوئی کی گئی ہے۔ محکمہ موسمیات نے سندھ میں رواں ماہ ممکنہ ہیٹ ویو کا خدشہ بھی ظاہر کیا ہے۔
محکمہ موسمیات کے مطابق رمضان المبارک کا تقریباً ڈیڑھ عشرہ بغیر بارش کے گزر چکا ہے جس کے باعث درجہ حرارت معمول سے زیادہ ریکارڈ کیا جا رہا ہے۔ حکام کا کہنا ہے کہ ملک کے بیشتر میدانی علاقوں میں آنے والے دنوں میں بھی گرمی کی شدت میں اضافہ متوقع ہے۔
ڈی ڈی میٹ عرفان ورک کے مطابق آئندہ چند روز کے دوران ملک کے بیشتر میدانی علاقوں میں موسم گرم رہنے کی توقع ہے۔ انہوں نے بتایا کہ مغربی ہواؤں کا ایک نیا سلسلہ اگلے ہفتے کے آغاز پر بالائی علاقوں کو متاثر کر سکتا ہے جس کے باعث وہاں بادل چھانے اور موسم نسبتاً خوشگوار ہونے کا امکان ہے۔
محکمہ موسمیات نے بڑھتے درجہ حرارت کے پیش نظر سندھ میں ہیٹ ویو کا انتباہ بھی جاری کیا ہے۔ عرفان ورک کے مطابق سندھ کے مختلف علاقوں میں درجہ حرارت 37 ڈگری سینٹی گریڈ سے تجاوز کر چکا ہے اور اگر بعض علاقوں میں درجہ حرارت 40 ڈگری تک پہنچ گیا تو ہیٹ ویو کی صورتحال پیدا ہو سکتی ہے۔
اس کے علاوہ گلگت بلتستان اور خیبرپختونخوا کے بالائی علاقوں میں درجہ حرارت میں اضافے کے باعث برفانی جھیلوں کے پھٹنے کے خطرات بھی ظاہر کیے گئے ہیں، جس سے مقامی آبادی اور انفراسٹرکچر کو نقصان پہنچنے کا خدشہ ہے۔
