پاکستان میں جدید ٹیلی کمیونیکیشن نظام کی ترقی کی جانب ایک اہم پیش رفت سامنے آئی ہے جہاں 5G اسپیکٹرم کی نیلامی کامیابی سے مکمل ہونے کے بعد مقامی اور عالمی سرمایہ کاروں کی دلچسپی میں نمایاں اضافہ دیکھا جا رہا ہے۔
حکام کے مطابق اس نیلامی کے نتیجے میں تقریباً 500 ملین ڈالر کی سرمایہ کاری متوقع ہے۔
نیلامی کے عمل میں کئی بڑی ٹیلی کام کمپنیوں نے حصہ لیا جن میں Zong، Ufone اور Jazz شامل ہیں۔ ان کمپنیوں نے مختلف بینڈز کے لیے کامیاب بولیاں دے کر پاکستان میں تیز رفتار انٹرنیٹ سروسز کی توسیع کے لیے اہم قدم اٹھایا ہے۔
وزیر خزانہ کے مشیر خرم شہزاد نے اس موقع پر کہا کہ 5G اسپیکٹرم کی کامیاب نیلامی پاکستان میں ٹیلی کام اور ٹیکنالوجی کے شعبے میں غیر ملکی سرمایہ کاری کے بڑھتے ہوئے اعتماد کی واضح علامت ہے۔ ان کے مطابق عالمی کمپنیوں کی نئی سرمایہ کاری ملک کی معاشی پالیسیوں پر اعتماد کا اظہار ہے۔
انہوں نے مزید کہا کہ حالیہ عرصے میں مختلف شعبوں میں سرمایہ کاری کے رجحان میں اضافہ دیکھا جا رہا ہے۔ اس سے قبل قومی فضائی کمپنی کی نجکاری کے عمل میں بھی بڑی سرمایہ کاری سامنے آئی تھی جو ملکی معیشت میں اعتماد کی بحالی کا عندیہ ہے۔
حکام کے مطابق 5G ٹیکنالوجی کے آغاز سے نہ صرف انٹرنیٹ کی رفتار میں نمایاں اضافہ ہوگا بلکہ ڈیجیٹل معیشت، آن لائن کاروبار اور ٹیکنالوجی سے وابستہ شعبوں کو بھی فروغ ملے گا۔ اس کے ساتھ ساتھ ملک میں جدید ڈیجیٹل انفراسٹرکچر کی ترقی کی راہ بھی ہموار ہوگی۔
رپورٹس کے مطابق نیلامی میں کامیاب ہونے والی کمپنی جاز نے آئندہ 3 برسوں کے دوران پاکستان میں مزید ایک ارب ڈالر کی سرمایہ کاری کرنے کا اعلان بھی کیا ہے۔
ماہرین کا کہنا ہے کہ اس طرح کی سرمایہ کاری سے ٹیلی کمیونیکیشن سیکٹر میں مسابقت بڑھے گی اور صارفین کو جدید خدمات میسر آئیں گی۔
اقتصادی ماہرین کے مطابق مقامی اور عالمی سرمایہ کاری میں تسلسل ملکی معیشت کی بحالی اور طویل المدتی استحکام کے لیے مثبت اشارہ ہے۔ جدید ٹیکنالوجی میں سرمایہ کاری سے پاکستان کی ڈیجیٹل معیشت کو نئی سمت مل سکتی ہے اور عالمی سطح پر مسابقت بڑھانے میں مدد ملے گی۔
