لاہور میں کھیلے گئے پاکستان سپر لیگ کے گیارہویں ایڈیشن کے فائنل میں پشاور زلمی نے شاندار کارکردگی کا مظاہرہ کرتے ہوئے حیدرآباد کنگزمین کو شکست دے کر ٹائٹل اپنے نام کر لیا۔
قذافی اسٹیڈیم میں کھیلے گئے فیصلہ کن میچ میں پشاور زلمی نے 130 رنز کا ہدف 5 وکٹوں کے نقصان پر 15ویں اوور میں حاصل کر لیا، جہاں ایرون ہارڈی نے 56 رنز کی ناقابل شکست اننگز کھیلی جبکہ عبدالصمد نے 48 رنز کی ذمہ دارانہ اننگ کھیل کر ٹیم کی فتح میں کلیدی کردار ادا کیا، فرحان یوسف 4 رنز کے ساتھ ناٹ آؤٹ رہے۔
پشاور زلمی کی اننگز کے دوران کوشال مینڈس 9، محمد حارث 6 اور مائیکل بریسویل 4 رنز بنا کر آؤٹ ہوئے جبکہ کپتان بابر اعظم بغیر کوئی رن بنائے پویلین لوٹ گئے۔
اس سے قبل فائنل میں پشاور زلمی کے کپتان بابر اعظم نے ٹاس جیت کر حیدرآباد کنگزمین کو پہلے بیٹنگ کی دعوت دی، جہاں معاذ صداقت اور کپتان مارنوس لبوشین نے اننگز کا آغاز کیا، تاہم معاذ صداقت 11 رنز بنا کر جلد آؤٹ ہو گئے۔
مارنوس لبوشین اور صائم ایوب نے ٹیم کا اسکور 51 تک پہنچایا، لیکن لبوشین 20 رنز بنا کر آؤٹ ہو گئے، جبکہ عثمان خان 8 رنز ہی بنا سکے۔ دیگر کھلاڑیوں میں عرفان خان اور کوشال پریرا ایک ایک رن بنا کر آؤٹ ہوئے جبکہ گلین میکسویل بغیر کوئی رن بنائے پویلین لوٹ گئے۔
حسان خان 12 رنز بنا کر ایرون ہارڈی کی گیند پر کیچ آؤٹ ہوئے، حنین شاہ 9 رنز ہی بنا سکے، جبکہ صائم ایوب 54 رنز کے ساتھ نمایاں رہے، اور عاکف جاوید 5 رنز بنا سکے۔
پشاور زلمی کی جانب سے ایرون ہارڈی نے شاندار باؤلنگ کرتے ہوئے 4 وکٹیں حاصل کیں، جبکہ ناہید رانا نے 2 کھلاڑیوں کو آؤٹ کیا، اور سفیان مقیم و محمد باسط نے ایک ایک وکٹ حاصل کی۔
