کامران ٹیسوری نے سول اسپتال برنس سینٹر کی تقریب سے خطاب کرتے ہوئے کہا کہ سول اسپتال کے برنس سینٹر کی 20 ویں سالگرہ پر دلی مبارکباد پیش کرتا ہوں، 2004 میں قائم ہونے والا یہ سینٹر ایک تاریخی سنگ میل ہے۔
انہوں نے کہاکہ پبلک پرائیویٹ پارٹنرشپ اور فرینڈز آف برنس سینٹر کے کردار کو پائیدار وژن کی علامت سمجھتا ہوں، پاکستان میں کم از کم 100 برنس اسپتال ہونے چاہئیں، حکومتوں کا کام صرف زمین دینا نہیں بلکہ اسپتال تعمیر کرنا بھی ہے۔
گورنر سندھ نے برنس سینٹر انتظامیہ کو مکمل تعاون کی یقین دہانی کرائی اور کہا کہ سندھ کے ہر ضلع میں برنس وارڈ کا قیام ضروری ہے۔
واضح رہے کہ گورنر ہاؤس میں سول اسپتال برنس سینٹر کی 20 ویں سالگرہ کے موقع پر سادہ اور پروقار تقریب کا انعقاد کیا گیا جس میں بانی ارجمند اے قاضی، ڈاکٹر شائستہ آفندی رئیس اور محمد عبداللہ فیروز نے شرکت کی۔
علاوہ ازیں تقریب میں قطر، بحرین، عمان، چین اور جاپان سمیت مختلف ممالک کے قونصل و نائب قونصل جنرلز، فرینڈز آف برنس سینٹر کے اراکین، ڈاکٹرز اور دیگر معزز شخصیات بھی شریک تھے۔
