صدرِ مملکت آصف علی زرداری اور وزیراعظم شہباز شریف نے آسٹریلیا کے شہر سڈنی میں پیش آنے والے دہشت گرد حملے کی شدید الفاظ میں مذمت کرتے ہوئے آسٹریلوی حکومت اور عوام کے ساتھ مکمل یکجہتی کا اظہار کیا ہے۔
صدرِ مملکت آصف علی زرداری نے سڈنی میں دہشت گرد حملے پر گہرے دکھ اور افسوس کا اظہار کرتے ہوئے ہلاک ہونے والوں کے اہلِ خانہ سے تعزیت اور زخمیوں کی جلد صحتیابی کے لیے نیک تمناؤں کا اظہار کیا۔ صدر زرداری کا کہنا تھا کہ پاکستان خود دہشت گردی سے شدید متاثر رہا ہے اور اس طرح کے حملوں سے پیدا ہونے والے درد اور صدمے کو بخوبی سمجھتا ہے۔ انہوں نے دہشت گردی کی ہر شکل کے خلاف پاکستان کے اصولی مؤقف کو دہراتے ہوئے عالمی سطح پر مشترکہ کوششوں کی ضرورت پر زور دیا۔
وزیراعظم شہباز شریف نے سوشل میڈیا پلیٹ فارم ایکس پر جاری اپنے بیان میں کہا کہ سڈنی حملے کے متاثرین سے دلی ہمدردی ہے۔ انہوں نے کہا کہ پاکستان ہر قسم کی دہشت گردی کی مذمت کرتا ہے اور اس مشکل وقت میں آسٹریلوی عوام اور حکومت کے ساتھ کھڑا ہے۔ وزیراعظم نے متاثرہ خاندانوں کے لیے تعزیت اور زخمیوں کے لیے جلد صحتیابی کی دعا بھی کی۔
واضح رہے کہ آسٹریلیا کے شہر سڈنی میں یہودیوں کے ایک تہوار کے دوران فائرنگ کا واقعہ پیش آیا، جس کے نتیجے میں 12 افراد ہلاک اور 29 زخمی ہو گئے، جبکہ زخمیوں میں دو پولیس اہلکار بھی شامل ہیں۔ سڈنی پولیس کے مطابق واقعے کے بعد جوابی کارروائی میں ایک حملہ آور مارا گیا جبکہ دوسرے حملہ آور کو شدید زخمی حالت میں گرفتار کر لیا گیا ہے۔ پولیس نے فائرنگ کے اس واقعے کو باضابطہ طور پر دہشت گردی قرار دیا ہے۔
