سندھ کے وزیر شرجیل انعام میمن نے کہا ہے کہ پیٹرولیم مصنوعات کی قیمتوں میں اضافے کے بعد حکومت سندھ نے عوامی ریلیف کے لیے موٹر سائیکل سواروں کو 2000 روپے ماہانہ سبسڈی فراہم کرنے کا اقدام شروع کیا ہے تاکہ مہنگائی کے اثرات کو کم کیا جا سکے۔
انہوں نے بتایا کہ 25 ایکڑ سے کم زمین رکھنے والے ہاریوں کو باقاعدہ طور پر رجسٹرڈ کیا گیا ہے، ان کے مکمل کوائف حاصل کیے گئے ہیں، اور گندم کی کاشت کے لیے ڈی اے پی اور یوریا کھاد کی بوریاں مفت فراہم کی گئی ہیں تاکہ زرعی پیداوار کو فروغ دیا جا سکے۔
شرجیل انعام میمن کا کہنا تھا کہ حال ہی میں تھریشر چلانے کے لیے 1500 روپے فی ایکڑ کے حساب سے 3 لاکھ سے زائد افراد کو سبسڈی دی جا چکی ہے، اور یہ رقم کاشتکاروں تک پہنچ بھی چکی ہے، جس سے انہیں مالی سہولت حاصل ہوئی ہے۔
انہوں نے مزید کہا کہ شکارپور کی ترقی کے لیے دن رات کام جاری ہے، اور عوامی فلاح کے تحت مفت سولر سسٹمز بھی فراہم کیے جا رہے ہیں تاکہ توانائی کے مسائل کو کم کیا جا سکے۔
انہوں نے خواتین کو مخاطب کرتے ہوئے کہا کہ حکومت کی جانب سے بہنوں کو مفت پنک اسکوٹیز فراہم کی جا رہی ہیں، لہٰذا وہ آگے آئیں اور اس سہولت سے فائدہ اٹھائیں۔
