صوبائی وزیر تعلیم سندھ سید سردار علی شاہ کی زیر صدارت سندھ ٹیچرز ایجوکیشن ڈویلپمنٹ اتھارٹی کے بورڈ کے 19ویں اجلاس میں اساتذہ کے معیار کو بہتر بنانے کے لیے اہم فیصلے کیے گئے، جن کے تحت آئندہ اساتذہ کی بھرتیوں کو ٹیچنگ لائسنس ٹیسٹ سے مشروط کرنے کی اصولی منظوری دے دی گئی۔
اجلاس میں فیصلہ کیا گیا کہ ٹیچنگ لائسنس ٹیسٹ کو اساتذہ کی پیشہ ورانہ اہلیت جانچنے کے لیے مرکزی حیثیت دی جائے گی، جبکہ اس ٹیسٹ کا آئندہ مرحلہ رواں سال ستمبر میں منعقد کیا جائے گا تاکہ امیدواروں کو مناسب تیاری کا موقع فراہم کیا جا سکے۔
اجلاس میں سیکریٹری اسکول ایجوکیشن زاہد علی عباسی، ایگزیکٹو ڈائریکٹر سید رسول بخش شاہ، سماجی شخصیت شہزاد رائے سمیت دیگر بورڈ اراکین نے شرکت کی اور تعلیمی معیار کی بہتری کے لیے مختلف تجاویز پر غور کیا گیا۔
اجلاس کے دوران اس بات پر زور دیا گیا کہ اساتذہ کی بھرتی کے عمل کو شفاف اور میرٹ پر مبنی بنانے کے لیے جدید اور مؤثر نظام اپنایا جائے، تاکہ تعلیمی اداروں میں تدریسی معیار کو مزید بہتر بنایا جا سکے۔
