صدر مملکت آصف علی زرداری نے ملک بھر میں بڑھتی ہوئی بجلی کی لوڈشیڈنگ کا نوٹس لیتے ہوئے حکومت کو ہدایت کی ہے کہ عوام کو درپیش مشکلات کے پیش نظر لوڈشیڈنگ کے دورانیے کو کم سے کم کرنے کے لیے فوری اور مؤثر اقدامات کیے جائیں۔
تفصیلات کے مطابق ایوانِ صدر سے جاری بیان میں کہا گیا ہے کہ صدر مملکت نے توانائی کی موجودہ صورتحال پر گہری تشویش کا اظہار کیا اور متعلقہ حکام کو ہدایت دی کہ بجلی کی فراہمی کے نظام میں بہتری لائی جائے تاکہ خاص طور پر گرمی کے موسم میں شہریوں کو زیادہ سے زیادہ ریلیف فراہم کیا جا سکے۔
صدر آصف علی زرداری نے اس بات پر بھی زور دیا کہ حکومت بجلی کے بحران سے نمٹنے کے لیے تمام دستیاب وسائل بروئے کار لائے اور ایسے عملی اقدامات کرے جن سے عوام کو فوری فائدہ پہنچ سکے۔
بجلی کے مسئلے کے ساتھ ساتھ صدر مملکت نے پانی کے بحران پر بھی سخت موقف اختیار کرتے ہوئے کہا کہ پاکستان کے آبی حقوق کا ہر صورت تحفظ یقینی بنایا جائے، اور اس مقصد کے لیے بین الاقوامی سطح پر ضروری سفارتی اور قانونی اقدامات فوری طور پر کیے جائیں۔
انہوں نے کہا کہ توانائی کا حصول اور پانی کے وسائل کا تحفظ ملک کی بقا اور معاشی استحکام کے لیے نہایت اہم ہے، جبکہ حکومت کو چاہیے کہ طویل مدتی منصوبہ بندی کے ساتھ ساتھ فوری نوعیت کے اقدامات بھی کرے تاکہ عام شہریوں کو فوری ریلیف فراہم کیا جا سکے۔
