ملک بھر میں گیس بحران بتدریج شدت اختیار کر گیا ہے، جبکہ آر ایل این جی کی سپلائی متاثر ہونے کے باعث نئے گھریلو گیس کنکشنز کے اجرا پر پابندی عائد کر دی گئی ہے، جس سے صارفین کو مشکلات کا سامنا کرنا پڑ رہا ہے۔
ذرائع کے مطابق پہلے سے جمع کرائی گئی درخواستوں پر عملدرآمد کو بھی عارضی طور پر روک دیا گیا ہے، جبکہ ارجنٹ واؤچر اور ڈیمانڈ نوٹس جمع کروانے والے صارفین کے کنکشنز کا عمل بھی فی الحال معطل کر دیا گیا ہے۔
اس پابندی کے نتیجے میں ہزاروں نئے گیس کنکشنز التوا کا شکار ہو گئے ہیں، جس سے ان افراد کو شدید پریشانی کا سامنا ہے جو طویل عرصے سے کنکشن کے منتظر تھے۔
واضح رہے کہ کئی سال تک پابندی کے بعد چند ماہ قبل ہی نئے گیس کنکشنز جاری کرنے کا عمل دوبارہ شروع کیا گیا تھا، اور بحران پیدا ہونے سے قبل سینکڑوں صارفین کو نئے کنکشنز فراہم بھی کیے جا چکے تھے۔
